नारी शक्ती पुरस्कारासाठी ३१ जानेवारीपर्यंत प्रस्ताव आमंत्रित

 नारी शक्ती पुरस्कारासाठी ३१ जानेवारीपर्यंत प्रस्ताव आमंत्रित

वाशिम, दि. २८ : केंद्र शासनाच्या महिला व बाल विकास विभागामार्फत दिल्या जाणाऱ्या नारी शक्ती पुरस्काराकरिता प्रस्ताव आमंत्रित करण्यात आले आहेत. व्यक्ती अथवा संस्थेला ३१ जानेवारी २०२१ पर्यंत www.narishaktipuraskar.wcd.gov.in किंवा www.wcd.nic.in या संकेतस्थळावर आपले प्रस्ताव ऑनलाईन स्वरुपात सादर करता येतील. प्रस्ताव केवळ ऑनलाईन स्वरूपातच स्वीकारले जाणार आहेत. ३१ जानेवारी नंतर आलेल्या प्रस्तावांचा विचार केला जाणार नाही.

वैयक्तिक पुरस्काराकरिता अर्जदाराचे वय हे पुरस्कार वर्षाच्या १ नोव्हेंबर रोजी २५ वर्षे पूर्ण असावे. अर्जदार संस्था असेल तर संबंधित क्षेत्रात किमान ५ वर्षांचा कार्यरत असावी. अर्जदाराने हा पुरस्कार किंवा स्त्री शक्ती पुरस्कार या पूर्वी प्राप्त केलेला नसावा. दरवर्षी २० फेब्रुवारी रोजी सदर पुरस्कार प्राप्तकर्त्यांच्या नावाची घोषणा करण्यात येवून ८ मार्च रोजी जागतिक महिला दिनी पुरस्कार प्रदान करण्यात येतो. याबाबतची सविस्तर माहिती संकेतस्थळावर उपलब्ध आहे. या पुरस्कारासाठी नामांकन सादर करण्याचे आवाहन जिल्हा महिला व बाल विकास अधिकारी सुभाष राठोड यांनी केले आहे.